په داسې حال کې د چين د سي چوان زلزلې قربانيانو شمېر تر ٦٠ زره کسانو اوړي، د ملگرو ملتونو عمومي منشي بان کېمون د پېښې ځاى ته تللى دى .
ښاغلى کېمون د چين له ولسمشر هوجنتاو سره په داسې حال کې وليدل ، چې د سي چوان په ايالت کې يې د زلزلې ځپل شوو ځايونو ليدنه کوله، او دواړو مشرانو د ينگزوى سيمې لپاره د بېړنۍ مرستې غوښتنه وکړه .
دغه زلزله د چين په سي چوان ايالت کې د روانې مۍ مياشتې پر ١٢ نېټه وشوه .
چينايي چارواکي وايي چې په دې هېواد کې د زلزلې د قربانيانو شمېره شاوخوا ٦٠ زره مړو ته رسيږي .
ښاغلى کېمون وروسته له هغه چين ته ولاړ، چې د برما بړبوکۍ ځپلو ليدنه يې وکړه چې شاوخوا لس زره کسان پکې ووژل شول، او هلته يې د توپان ځپل شوو لپاره د لانورو مرستو غوښتنه وکړه .
د چينايي چارواکو پرينا د شوې زلزلې له امله شاوخوا ٥.٤٧ مليون وگړي بې کوره او بېځايه شوي دي .
همداراز دوى وايي چې په چين کې يې د ويجاړو شوو سيمو د بيارغاونې په موخه لس مليارده ډالره ځانگړي کړي دي .
د چين د شينخوا رسمي خبري آژانس ويلي چې له زلزلې وروسته په سيمه کې د اوبو راغونډېدو له ا مله شاوخوا ٣٤ ډنډونه جوړ شوي چې سيمه يې د انسانانو له اوسېدو ايستلې ده .
هو اپېژندونکو هم دا خبر ورکړى چې ښايي په راتلونکې اوونۍ کې په سيمه کې ډېر بارانونه وشي چې له امله به يې لا ستونزې ډېرې شي . له بي بي سي نه په مننې
| 
