Personal site

عابد

nasirzaland — Tue, 03 Mar 2009 06:07:38 GMT

نور به ورته څومره انتظار کوم
کله به دې کاڼي زړه ته لار کوم

ستا د ښکلا نښې ور پکې وينم
ځکه خو د هرې ښکلا څار کوم

ته خو يو وعده د خولګۍ وخو کړه
خېر دی زه تر ډېره ورته وار کوم

چاراته ويلې چې اوس څه کوې؟
ما وی چې د مينې کار وبار کوم

ځم چيرته له غرونو پسې اوړمه
باز يمه د سپينې بازې ښکار کوم

په فساد تور پوليس بېرته خوشي شول

nasirzaland — Tue, 03 Mar 2009 05:51:14 GMT

افغان چارواکي وايي په فراه ولايت کې نيول شوي په لسگونه پوليس له پوښتنو گرويږنو وروسته د دغه ولايت د محکمې له لوري آزاد شوي دي .

د فراه ولايت چارواکي وايي دغه پوليس په تېروتنې نيول شوي وو چې د دغه ولايت د محکمې له لوري له پلټنو وروسته بې گناه پېژندل شوي دي .

په فراه ولايت کې نژدې درې مياشتې وړاندې څه د پاسه څلوېښت تنه افغان پوليس په غلا غديو او له موټرو چلوونکو نه د پيسو اخيستو په تور د امنيتي ځواکونو له لوري نيول شوي وو.

افغان چارواکي مني چې نيول شوي پوليس په نشه يې توکو روږدي وو، خو دا نه مني چې هغوى په اداري فساد او د لارو په اوږدو کې د مسافرينو په زورولو کې لاس درلود .

د فراه ولايت مرستيال والي محمد يونس رسولي وايي د محکمې له پريکړې وروسته له دغو کسانو د پوليسو جامې او نور وسايل اخيستل شوي او هغوى د پوليسو له ليکو ايستل شوي دي .

د ښاغلي رسولي په وينا د پوليسو هغه مشران په تېښتې بريالي شوي، چې په اداري فساد او ورته نورو جرمونو کې يې لوى لاس درلود .

وړاندې له دې د فراه ولايت په فرا رود سيمه کې يوشمېر افغان پوليسو خپلې وسلې پلورلې وې او د کار موندنې لپاره گاونډيو هېوادونو ته تښتېدلي وو.

فراه د افغانستان په لوېديځ کې پروت هغه ولايت کې چې کله ناکله ترې د ناامنيو خبرونه رارسېږي .

په فراه ولايت کې په نشه يې توکو يوشمېر افغان پوليس په داسې مهال د محکمې له لوري ازاد شوي چې په کابل کې بيا د نشه يې توکو پرضد د ځانگړې محکمه له لوري ځينو افغان پوځيانو او پوليسو ته د نشه يې توکو د چاقاق په تور د بند سزاګانې اورل شوې دي .

ولسمشرکرزې سياسی ځان وژونکۍ بريدوکړ

nasirzaland — Mon, 02 Mar 2009 11:37:13 GMT

د کرزې صاحب فرمان دراتلونکو ټول ټاکنو په اړه د افغانستان داساسی قانون ٦١ مادې ته د درناوې کولو معنا لرې که د اقتدار اوږد والې ته ارزښت ورکولو!!!؟؟؟٠

دا هغۀ پوښتنی دي چی هر په هيواد مين افغان وګړې ته دلمر په ځير روښانه دي، پدي ښه پوهيږې چی بيا ددغه مظلوم ولس د برخليک په اړه دځان دبقا لپاره داوسنيو واکدارنو له پلوۀ سوداګرې بينا شويده، دا ځرګنده نده چی ددغې لوبې اصلی ګټونکې به ځوک وي ولس او که يو ځو سياسی سودا ګر؟
ولس پنځه کاله مخکی همدغه بی کفايته کرزې صاحب ته په ډيرو بدو سياسی، ټولنيزو، اقتصادی او فرهنګی حالتو کی خپلې رائی په دي بنسټ ورکړې ترځو د واقعی ولسواکې پروسی پلو ته د تګ سريزه پيل شي، دا چی ولس نورۀ ځه تمه درلوده هغه به پر ځاې بريږدو٠ ولس خپل مسووليت په داسی تاريخی پړاوکی چی ورسره مخ شويوه په ښه ډول ادعا کړې دي، دا چی اوسنيو واکدارنو په مقابل کی ځه ورکړې دي دا قضاوت به پريږدو تاريخ ته٠ افغان مجاهد ولس کرزې صاحب ته دا رائی ددي لپاره ندي ورکړې چی ګوني دا ځوکی ميراثی ستا شوه، بلکی افغان مجاهد ولس دا دولسواکې سريزه ګڼله٠
د افغانستان دمعاصر تاريخ په اوږدو کی دا لمړې ځل ندي چی زمونږ دسياست د ډګر مکاران او مداريان داسی دملی او ولسی ګټو ضدلوبی کوې، په ډير تاسف سره چی دداسی بی مسووليته چمونو تاوان او جبران دغه مظلوم ولس ته تل ډير ګران تمام شويدي٠
پوښتنه دا ده چی ايا دغه فرمان واقعا" عملې بڼه اخستی شي او که يو سياسی ځان وژونکې بريد دي؟
زما په اندکه چيرته کرزې صاحب رښتيا اساسی قانون ته ارزښت قايل واې او ملی ګټی ئی دپام وړ واې، لازمه وه چی دغه فرمان ئی حداقل شپږ مياشتی مخکی له ټوټاکنوځخه ورکړې واي تر ځو بهرنې ټولنې، افغان ولس او دجمهورې رياست نوم اندو هر چاه په خپله برخی کی چمتوالې نيولي واې٠ که اوس چيرته کرزې صاحب دا دليل وړاندې کوې چی پر ده باندې انتقادونه زيات وه چی ولی ټاکنې وه ځنډېدی هغه انتقادنه د ټاکنو په ځنډيد نه بلکې هغه انتقادات د کرزې صاحب داقتدار اوږدوالې وه٠
دوهمه خبره دا ده چی که کرزې صاحب رښتيا د ولس غوښتنو ته درناوي کوي، ولس هر ځه رڼه او سپين غواړې خو په تاسف سره چی کرزې صاحب په دغه اووه کلونو کی لدغي ازموينې ځخه ناکام راتوې دي٠ د کرزې صاحب لپاره صرف د هغۀ د اقتصادې مافيائی ټيم، د مخدره توکو د مافياټيم او دسياسی سبوتاژونو ټيم ګټی د بل هر ځه ځخه دپام او غور وړ دي٠ خو پدې هم لازمه ده چی پوه وي چی ددغی انتحاری بريد لمړنې قربانيان به همدوي وي دا ځکه چی پدغه اووه کلونوکی دافغان باتوره ولس سره کرزې اودغو دريګونو ډلو سترې جفاګانې کړېدي او دغه مظلوم خو باتوره ولس نور دداسی بی مسووليته او بی کفايته ځيرو زغم نلرې، او نه دا هغه پخوانې وختونه دي چی ځه يو کس او يا يووه ډله وائی هغه به منل کيږې، اوس ښه والي پدې کی دي چی د افغان مجاهد ولس او نورو نړيوالو راتلونکې ښيګڼې او خطرونه سره شريک شويدي٠
دنړې ټول ولسونه ويښ دي اوهر څه ځاري چی ځوک ځه کوې افغان ولس هم ددغې نړې يو برخه جوړه وي خو دغه مظلوم ولس چی کوم زغم ددغو سياسی سوداګرو مقابل ګاللی دي هغي د لويو ملی ګټو په پام کی نيولو لپاره دي , نه د ځو په ګوتو شمار واکدارنوپخاطر. که چيرته دغه مجاهد ولس پدې پوه شې چی بيا هم پدغه ٢١ پيړې کی د دوي ملی ګټی د ځو تنو د شخصی ګټو قربانې کيږې نو بيا هغه ځه کوې چی زمونږ د هيواد تاريخ ورباندې ګوا دي٠ په ډيرې خواشينې سره چی ددغه ځان وژنکې سياسی بريد لمړنې قربانيان معلوم دي بيا هم ټوله لوې قربانی ولس ته ورپه غاړه ده لکه ځنګه چی دغه تير اووه کاله افغان ولس د لويو ملی ګټو دساتلو او درناوې لپاره رنګا رنګ ستونزی او ناخوالې ګاللی دي٠
اوس زه پدې باوريم چی دولس دصبر کاسه مخ په ډکيدو ده دا ځکه چی دټولو هيوادوالو تمه راتلونکو ټوټاکنو ته وه، دا هيله اوس هم لرې چی ٢٠٠٩ ميلادې کال په ټولټاکنو کی به ځانونو ته په ښه فکر سم برخليک د رائي ودپاڼو په بنسټ ټاکې ، که دا هيلې چيرته د کرزې صاحب دبی مسوليتی او په قدرت مينتوب له کبله سبوتاژ شې نو افغان ولس ته نه جبران کيدونکی پائيلی لرې پدې چی افغان ولس ته ورستی د زغم ټکې همدا دي٠

بل اړخته نړيواله ټولنه ده چی هغوي هم پدي تمه دي چی په افغانستان کی په راتلونکو ټولټاکنوکی يووه مسووليت منونکې اداره رامنځ ته شې تر ځو هغوي خپل اوږد مهاله ستراتيژيکی دريځونه ورسره شريک کړې، ځکه چی په دغه اوسني بی کفايته او بی ظرفيته اداره هيځ ځوک اعتبار نشی کولاې چی سحر يو ځه وائی او ماښام بل ځه، راځی چی دغه خبره صادقانه وکړو چی دا مونږ او تاسی خپله افغانان دي ته چمتو يو چی د کرزې صاحب دحکومت سره د يو من جوارو سودا وکړو ؟ زما په اند دټولو ځواب به نه وي٠

دلته يو ټکې د پام وړ دي چی که چيرته زمونږ د بی مسووليتی له کبله کوم سيمه يز قوت نړيوالوته پيدا شې اودا ډاډ اوتظمين ورکړو چی لدغی سيمي ځخه هغوي ته په راتلونکی کی نور کوم خطر نشته ، بيازما په اند نړيوال هم زمونږ د غمه ډير ندي مړه ځکه چی مونږ خپله هر ځه دسليقو او شخصی ګټو قربان کړو، پدې کی هغوې مونږ سره ځه مرسته کوائی شې٠
د کرزې صاحب ادارۀ نورۀ د افغانانو او نړيوالو داعتبار وړ نده او نه کوم پرمختګ لرې چی يا افغانان او يا نړيوال ورته سترګې په لار شې٠
دناورينه د وتلودحل لارې چارې :-
١ د افغانستان ټول وګړې چی په هيواد کی دي او که هيواده بهر لازمه ده چی د خپلو خلکو دبرخليک ټاکلو په اړه خپل ملی، اسلامی او افغانی مسووليت درک کړي، ټول خپلمنځی اختلافات دملی لويو ګټو لپاره تر پښو لاندې کړې٠
٢ ټولی سياسی، ټولنيزي ، فرهنګې ډلې او خپلواکۀ ځيرې اړينه ده چی د يووي ملی طرحۀ لاندې سره راټول شې تر ځو نړيوالو او افغانانوته ددغه ناورين نه د وتلو لارې چارې په شريکه په کوته کړې ٠
٣ ټولې ملی خپلواکه ځيرې اړينه ده چی ددغه ناورين په هکله خپل سالم دريځ په ډير روښانه ډول څرګند کړې، او دهغه احتمالی خطرونه ټولو هيوادوالو او نړيوالو ته ښکاره کړې٠
٤ په هيواد دننه او بهر اړينه ده دسالم فشار اچولو قوې ګروپونه جوړ شې تر ځو دافغانستان په دولت او بهرنې نړې زور واچوې چی راتلونکې ټولټاکنې رڼی او بی پرې وي٠
٥ دټاکنو دخپلواک کميسيون مشرتابه اړينه ده چی نوئي شې او دټاکنو ټول مرکزونه د ملګرو ملتونو او اروپائی ټولنې د ځارګرو تر ځار لاندې ټاکنې ترسره کړې٠
٦ که چيرته کرزې صاحب واقعا"غواړې چی دغه فرمان پلې شې او بی پرې ټاکنې وشې نو لازمه ده چی له خپلې دندې دغه اوس استفا وکړې او يا هم د نوم اندې ځخه تير شې٠
٧ که چيرته دافغانستان دولت دي ته چمتو نوي چی ټانکې رڼی اوبی پرې وشې نو بيا د جمهورې رياست ټول نوم اندې لازمه ده په يوغږ د ټاکنو ځخه داحتجاج پډول بايکاټ وکړې٠
د يو سوکاله او اباد افغانستان په هيله

اجمل شينوارې

دروېش درانی،

nasirzaland — Mon, 02 Mar 2009 10:21:59 GMT

ويجاړ وطن

شاعر: دروېش درانی، کوټه

سرهْ زخمونه په مثال د سرو غالبُوزو
په فضا كي د وطن دي را الوتي
د وګړو په بدن پوري دي نښتي
انسانان دي لېونو غوندي په منډه
هر طرف ته فريادونه دي، ژړا ده
په وطن كي مو د جنګ داسي بلا ده
چي نهْ سترګه، نهْ ئې غوږ، نه ئې سپږمه شته
ټول بدن ئې دآ غاښونه او غاښونه
سر تر نوكه ئې وجود دیژامي ژامي
روغي وني او ښاخونه خوري بې درېغه
د كورونو دېوالونه خوري بې درېغه
د وګړو اندامونه خوري بې درېغه
دا خوراك به وركوو تر كومه وخته
دا بلا به زياتي باسو له وطنه
دا وطن به يو ځل بيا ودانول وي
څيري څيري دېوالونه ګنډل غواړي
هم شړۍ او هم شالونه ګنډل غواړي
خو دا كار لري لالېه ډېري ستونزي
دا په دا چي موږ له لاسه دي وركړي
دومره سترګي، دومره پښې، دومره سرونه
چي حساب ئې وهيچا ته معلوم نهْ دی
په دې ورځو كي به كار له سپما اخلو
اندامونه له دې قامه سره لږ دي
روغ بدن وهر سړي ته نهْ رسېږي
په يَوهْ پوست كي به دوه تنه اوسيږو
په يَوه خُلهْ به څلور كوو خبري
دايووخت دی،داسي وخت دی،پر موږباندي
چي تا دواړې پښې بايللي دي په جنګ كي
زهْ هم نهْ لرم په تن پورى لاسونه
په يواځي سر نهْ تهْ شې څهْ كولاى
او نهْ زهْ د څهْ كولو وس لرمه
ځه چي دواړه يو وجود او يو بدن شو
تهْ زما په پښو روان شه خپل منزل ته
زهْ به ستا په لاس غلمينه ډوډۍ خورمه
زهْ به ستا په لاس سپڼسی او ستن را وا خلم
څيري څيري دېوالونه به ګنډمه
دا مثال به ټول اولس ته يو مثال شي
ټول وګړي به نزدې شي و يو بل ته
ړوند به لاره د كاڼهْ په سترګو ويني
كوڼ به اوري د ړاندهْ په غوږ سندره
په شريكه به وطن ودانول وي
كروندې به زياتي نهْ پرېږدو بې كښته
اندامونه به كرو په كړه كړه
دايووخت دی ،داسي وخت دیچي موږوينو
د قميص لستوڼي دوه وي خو لاس يو وي
دوې مو چڼي انتظار وي يوې پښې ته
دا كمَی پوره كول غواړي په ګډه
زياتي نهْ كوو له دغه كاره ډډه
لا تر كومه به په وينو وي ككړه
د غنمو په بُوى خپله فضا مينځو
سر تر پايه به وطن په رڼا مينځو

قران کريم ته دسپکاوي په غبرګون په ننګرهار کې لاريون وشو

nasirzaland — Mon, 02 Mar 2009 10:05:47 GMT

ننګرهار پوهنتون سلګونو محصلينو په غزني ولايت کې د بهرنيو ځواکونو لخوا د قران کريم دسپکاوي په غبرګون د کب په ١٢مه، لاريون وکړ .

دغه لاريون کوونکي چې شمېر يې سلګونو تنو ته رسېده د بهرنيو ځواکونو له لوري په غزني ولايت کې قران کريم ته د سپکاوي د غندلو په موخه راوتلي وو چې د جلال اباد _ کابل لار يې هم دترافيکو پرمخ تړلې وه .

د ننګرهار پوهنتون د حقوقو دپوهنځي يو تن محصل صفت الله پژواک خبري اژانس ته وويل چې بهرني ځواکونه دې نه يواځې له مسلمانانو بښنه وغواړي ، بلکې قران کريم ته سپکاوي کوونکي دې محاکمه کړى شي .

هغه زياته کړه : (( افغان دولت دې بهرنيو ته اجازه نه ورکوي چې زموږ دملي او ديني اساساتو بې حرمتي او سپکاوى وکړي او له افغان دولت نه غواړو چې دغزني دپېښې عاملين ونيسي او دقانون منګلو ته يې وسپاري . ))

د کرنې پوهنځي يو تن محصل سميع الله په داسې حال کې چې قهرېدلى ښکارېده پژواک اژانس ته وويل :(( موږ نه غواړو چې بهرنيان دې زموږ د ښځو،ديني او ملي اساساتو او زموږ د خلکو بې حرمتي وکړي او بې ګناه خلک دې شهيدان او ټپيان کړي . ))

دغو لاريون کوونکيو په خپلو شعارونو کې مرګ په امريکا،اوباما،په افغانستان کې مېشتو بهرنيو ځواکونو،اسراييلو او ژوندي دې وي اسلام او اسلامي هېوادونه شعارونه ورکول .

لاريون کوونکيو په پاى کې يوپرېکړه ليک ولوست چې په هغه کې له دولت او نړيوالې ټولنې نه غوښتل شوي چې امريکايي ځواکونه دې له افغانستان څخه ووځي،خپل سري عمليات دې نه کوي،دقران او اسلام درناوى دې وکړي .

په پرېکړه ليک کې زياته شوې، که چېرې ددوى غوښتنې ونه منل شي، نو دوى به خپلو سوله ييزو لاريونونو ته ادامه ورکوي .

د ننګرهار پوهنتون رييس پوهندوى امان الله حميدزي پژواک خبري اژانس ته وويل چې لاريون په سوله ييزه توګه ترسره شوى او محصلين بېرته خپلو پوهنځيو ته راغلي دي .

د امنيه قوماندانۍ وياند سمونوال عبدالغفور پژواک اژانس ته وويل چې لاريون د سهار په نهه نيمو بجو پيل او تر لسو بجو پورې يې دوام درلود .

د هغه په وينا، په لاريون کې شاوخوا ٥٠٠ تنو محصلينو برخه اخيستې وه او پوليسو يې کلک امنيت نيولى وو .

د يوه بل خبر له مخې ، په جلال اباد ښار کې دکمپيوټر ساينس پوهنځي محصلين هم د غزني د پېښې په غبرګون لاريون ته راووتل او د بهرنيو ځواکونو پر ضد يې شعارونه ورکول .

ديادونې وړ ده، چې په غزني ولايت کې مېشتو بهرنيو ځواکونو د کب په ٩مه شپه د دوو جوماتونو د تالاشۍ پر مهال د قران عظيم الشان بې حرمتي کړې وه.

ددې پېښې په غبرګون دغزني ښاريانو د کب په ٩مه ، لاريون وکړ، چې دپوليسو په ډزو يې يو شمېر لاريون کوونکي ټپيان شول .

هلمند:

nasirzaland — Mon, 02 Mar 2009 10:02:36 GMT

هلمند:
دپاکستان نامتو انگلیسی ژبی ورځپاڼې چه The News International نومیږ ی دسږ کال دفبروری دمیاشتی په 24 نیټه خبر راکړچه دافغانستان دطالبانو مشرملا محمدعمرمجاهد خپل هغو برادرانو ته ته چه په شمالی او لویدیزوزیرستان کی فعالیت لری هدایت ورکری د ه چه پر پاکستانی امنیتی قوتونوباندی خپل ټول یرغلونه ودروی. ملا عمر لمړ ی یواستازی وزیرستان ته واستوله او ورپسی خپل مطلب د یو لیک په تر څ د تحریک طالبان پاکستان (TTP) مشرانو ته څرگند کړل. د طالبانو مشر ملامحمد عمر مجاهد د دغه اعلاميې په ترڅ كې پر پاكستاني طالبانو غږ كړى، چې له پاكستاني پوځ سره جګړه بنده كړي اود افغانی طالبانواوالقاعده سره یو ځای په افغانستان كې دميشتو بهرنيو ځواكونو پرخلاف وسله پورته كړي.

ملامحمد عمر پدغه پيغام کی د پاكستان د مذهبي ډلو مشرانو ته په خپل ليكلي خطاب كې رسولى دى. چه له مسلمانانو سره جهاد نه دى روا. ده په خپل پيغام كې ويلي: "پر پاكستاني امنيتي ځواكونو، په قبايلي سيمو كې د مسلمانانو وژل د مجاهدينو بدنامي ده، دا په افغانستان كې د ناټو او امريكايي ځواكونو پر وړاندې روان جهاد ته زيان اړوي". د پاكستان د نيوزانترنشنل ورځپاڼې له مخې، ملامحمد عمر په وزيرستان كې د پاكستاني طالبانو له دريواړو ډلو، چې په دې وروستيو كې دISI او ملاعمرپه لمسون په يوه جبهه (TTP)كې سره راغونډې شوې، غوښتي، چې په افغانستان كې د ميشتو بهرنيو ځواكونو پرخلاف ګډ كار وكړي، ځكه امريكا او ناټو په افغانستان كې د خپلو پوځيانو شمېر ډېروي.

داسلام یو ټیکدار چي جهادپه پاکستان کي ناروا بولي خوپه افغانستان کي روا
خپله دپیغلانو په منځ کي چړچې وهي خو زما د خویندواو لوڼو مکتبونه په بمونو الوزوي

دملا محمد عمر مجاهد ددغه لیک متن چه پر اخوانی پان اسلامیزم ولا ړ ه ده اوخپل وطن اوخللک دالقاعده اوISI دگتودقربانی کولو معنی لری، دببرک کارمل هغه بیانیه ته ورته ده چه پکی وویل: " دوستی افغان – شوروی شرط وطنپرستی است". دکارمل خبری هم په "پرولتری انترنشنلیزم " ولا ړ ه وه خو کارمل دخپل عمر په آخرو ور ځوکی یو ایرانی خبریال سره په مرکه کی ویلی وه چه دهغه باور نه چه پرروسانودرلود سخت پښیمانه وه.
پاکستانی پو ځ دایران دپخوانی بادشاه دله مینځه تلونه راپدی خواه دامریکی دحکومت دسیمه ایزژاندارم په ټوگه وظیفه تر سره کوی. دپاکستان امنیتی ځواکونه په دغه دوره کی خپل معاشونه ا ووسلی دامریکا دحکومت نه اخلی. خوسره ددی دا پو ځ دخپل اخوانی افسرانوپه خاطراو لدی کبله چه دملا کارمل د"دوست هیواد" پو ځ ده، "مسلمان" بلل کیږی . خو دملا عمرمجاهد په نظرنه یوا ځی افغان پوځیان او پولیس، بلکه افغان ښوونکي، دجماعتونوملایان، داکتران، دلاری جو ړولوعادی کارکوونکی اوحتی هغه کلیوال چه دخپلی سیمي دماینونوپه پاکولو کی بوخت دي کافران اومباح الدم گنل کیږ ی. یوا ځی په 2008 میلادی کال کی په زرگونه تنه ملکی افغان وگړی دطالبانوپه نظامی فعالیتونه کی ووژل شول خو دملا محمدعمرمجاهد غږ پورته نشوچه دافغان طالبان، پاکستانی طالبان او القاعده نه وغوا ړی چه پخپل تخریبی فعالیتونو کی دمسلمان ملی وگړی دژوندساتنی ته پاملرنه وکړ ي.
که ملا محمدعمر مجاهد په ر ښتیاهم یوافغان وای دافغانستان ملی گتي تر القاعده او ISI گتي لو ړ ګنل بایدپدغه شرایطو کی چه امریکا په افغانستان کی دخپل سرتیروشمیردزیاتوالی پلان لری، ټول طالبانو ته ویلی وای چه پرافغان پو ځیانو باندی یرغل بندکړ ی اوددی دپاره چه په افغانستان کی ویجاړونکی جگړ ه ختمه شی اودملکی افغانانو وینه دالقاعده ، ISI ، ناتواو اییتلاف په لاس توی نشی باید دیرژردافغان دولت او ناتوداستازو سره دخارجی پوځونو دوتلو دزمانی پروگرام اودافغانستان دسیاسی استقلال دخوندی کیدو دپاره خبری پیل کړی وای. . ملا عمرپه 1380 کال کی دبن لادن په خاطرافغانستان دجنگ په ډ گربدل کړ ه اوپدی ډ ول دخاین شمالی ډلی تپلی دبیرته راتگ دپاره لاره اهواره شوه. اوس ملاعمرمجاهد غوا ړ ی چه پاکستانی طالبان او دالقاعده تر مشری لاندی نورخرابکارقوتونه دافغانستان دویجا ړ و لو دپاره متحد کړی. نتیجه دا شو چه TTP پاکستانی حکومت ته ددایمی اوربند وړاندیز وکړ . آفرین ملا کارمله!

ا. بارکزی

پردى غم

ahmad_shah — Thu, 12 Feb 2009 13:30:13 GMT

د ګوروان ښځې خپل زوړ لستوڼى پر خپلو لندو بغورو (بارخوګانو) راتېر كړ، په سونګېدا يې وويل:
"څه وكړم، نن يې دويمه ده، اوښكې مې نه تم كېږي. مرګي رانه يوازېنى ځوانكى زوى بېل كړ، زه بوره شوم...."
دا وخت د وير خبرو زورورې ژړا ته ځاى پرېښود.
د خان، غوښنې ښځې په تريو تندي وويل:
"بس، بس! ناشكري مه كوه، خداى به درڅخه ناراضه شي، تر اوسه لا ځوانه يې، خداى به دې يوځل بيا لمن درزرغونه كړي..."
دا وخت د خان وچ كلك، ګوربى مزدور د ګوروان د كوټې په وره كې ودرېد. ده په ستړي غږ وويل:
"خان ناوې، خان ناوې! برګه غوا د كورپې رشقې په خوړلو ټنډه شوه".
د خان ښځه د كريږو په بدرګه له كوټې ووته، شېبه وروسته، دې په خپلو تېرو كوكو د چغې د ډول غوندې د كلي وارخطا ښځې پرځان راټولې كړې، د خان ښځه د خپل كور په لوى انګړ كې د خپلو ګورم غواوو په منځ كې ناسته وه او په چغو- چغو يې ترمخ د پرتې حلالې شوې غوا وير كاوه...

پيشو

په وړكتوب كې مې د خداى په ژوندي سارو كې له پيشو څخه ورټ(كركه) كېده. خو څه چې دې بد اېسي، هغه به دې تل په څټ كې شين وي. هغه وخت د يوې كرغېړنې پېشو خدايزده له كومه زموږ په كور زړه لګېدلى و.
دې لټ او بېسېكه حيوان، د تنورپاك غوندې سپېره وزمه تور رنګ درلود. د هغې ظاهري بڼه لكه وروست جسد د كركې او نفرت وړ و. پيشو به تل خپل غرمني خوب ته زموږ د كور چوتره خوښه كړې وه. د هغې به سم دم خرهارى خوت، داسې خرهارى لكه د چلمي بنيادم له سږو څخه چې راخېژي. خو ما به هم پر كراره نه پرېښوده، ډېر وخت به مې د هغې تر خېټې لاندې د خپلې ښۍ پښې څپړه لاندې كړه،د پيشو ډنګره ملا به په هوا كې ليندۍ شوه او كله چې به يې راوتلي هډوكي پرځمكه ولګېدل، د هغې له چونګېدا به مې خوند اخيست.
نيكه به مې راته ډونګېده چې ولې د خداى بېګناه حيوان پر ځمكه نه پرېږدې. خو زه پوهېدم چې ده خداى پاري ويل نه كول، د نيكه عقيده وه چې توره پيشو د دېبانو او پيريانو له ارواوو سره په تماس كې وي. ځكه به يې تل له وېرې د خپلې برخې غوښې يوه ټوټه پيشو ته ورڅكله.
يو دوه ځلې مې په ګونۍ كې تر ليريو كليو تېره كړه، خو چې كله به ستړى ستومانه د انګړ پر دروازه راننوتم، لومړى به مې په چوتره كې غزېدلې پيشو ترسترګو شوه. دا هم پوهېدله چې چندانې خوند نه وركوم. ځكه به تل زما د سترګو له ديده ګوښه كېده.
يوه ورځ په كاهدانه كې د وچې رشقې ميده كولو ته كښېناستم. د ساتول له تېرولو وروسته مې د رشقې پولۍ(كودۍ) ته لاس وراوږد كړ، يو ناڅاپه پيشو له كريږې سره پر وچه رشقه ورټوپ كړل. دا د پولۍ هغه ځاى و، چې ما به خپلې ګوتې وروړلې. د پيشو په دې جرئت مې لړمون اور واخيست. په خوشكه مې پر هغې د تېره ساتول وار وكړ. پيشو له يوې زړه لړزوونكې چغې وروسته بوڅه واوښته. د هغې له رغړېدو سره مې له وېرې زبون ووهل شو. پيشو په خپلو چمبو كې ټينګ نيول شوى، يو ګزى مار له رشقې نه راايستلى و. په پوړېدلو(لړزانده) ګامونو دباندې ووتم. لكه نوې ساه چې راننوتې وي، يو دم مې چغه كړه:
"هلئ مار دى".
شېبه وروسته د كور نارينه وو د مار په لټه پسې په څلورښاخو د وچې رشقې توشپلو (راسپړلو- پاشلو) ته لستوڼي راونغاړل.
په پيشو پسې مې هر لوري ته مغزى كوږ كړ. خو د خپل ژوند ژغورونكې مې ترسترګو نه شوه.
پر ځمكه څڅېدلو سرو څاڅكو اړ ايستم چې كاهدانه پرېږدم. وينه د چمبړ(كلا) د دوړېدلي دېوال لوري ته څڅېدلې وه. د دېوال سيوري ته مې غزېدلې پيشو ترسترګوه شوه. د ساتول وار د هغې پر ككرۍ له وينو ډك پرار جوړ كړى و.د تېر فكر هندارې مې پر مغزو زور راوست. له ځان څخه مې ورټ وشو، د زړه په غوښتنه مې دواړه لاسونه د پيشو خوا ته اوږده كړل، چې په غېږ كې يې ونيسم، خو د پيشو وېروونكې چغې چې تر ډېره د بنيادم خوشكې ته ورته وه، زما خلاصې ګوتې په هوا كې سره ټولې كړې. زما په فكر د دې چغې مانا دا وه:
"اوس زما وار دى چې له تا څخه كركه وكړم، ته د دې وړ نه يې چې ما ته خپل خوني لاس راوړې، ته د يوه بېرحمه او بې عاطفې زړه خاوند يې..."
او زما ټټر هغه وخت تود لوندوالى احساس كړ، چې د پيشو په وينو سور جسد مې د اوښكو په بدرګه پر سينه پورې ولګاوه

ساجد بهار غزل

tolpashtana — Sun, 15 Jun 2008 11:55:54 GMT

غزل

دا نن مې چه له شونډو خندا پاکه ښويدلي

پرون مې له زړګوټي نه تڼاکه ښويدلي

داستا په ليوني حسن او ستا په باراني مخ

اشنا د نظر پښه مې څه بې واکه ښويدلي

جينۍ په ته مې شک دى ستا په موټي کې به نه وي

بيګا رانه سيکه اوښکه دردناکه ښويدلي

جانانه ترنم به دې په ستوني کې اور واخلي

له خياله مې سندره ده هلاکه ښويدلي

هغه چي دوښمنان به يې په ژمي کې خوالې کړل

(بهار) هغه چيغه مې له ځواکه ښويدلي

ساجد ( بهار) خوست

ساجد بهار غزل

tolpashtana — Sun, 15 Jun 2008 11:49:07 GMT

غزل

د رڼاګانو نه ساه باسي له هجومه ستوري

ځمکې ته ښکته راښويږي بې مفهومه ستوري

اوس د مينو په ورغوو کې سترګک نه وهي

ښايي چه وتي له ولکې دي له نجومه ستوري

د وخت فرغون دانه ټول اسمان په زور نيولى

ګرانې لمنې ته دې راوړمه له کومه ستوري

د ا ظالم وګورى په لپه کې نړۍ ځايوي

وړي هميشه زمونږ د کلي له مظلومه ستوري

په لوړه څوکه ورته ناست دى ترينه هار جوړوي

ساجد(بهار) بيا راښکيل کړي وي په لومه ستوري

ساجد(بهار) خوست

د کندهار له زندانه د تښتيدليو لټون دوام لري

tolpashtana — Sun, 15 Jun 2008 03:37:36 GMT

افغان چارواکي وايي چې د کندهار له زندانه د تښتېدلو زاندانيانو د بېرته نيولو لپاره يې د ناټو په مرسته په پراخو عملياتو لاس پورې کړى دى.

د سيمه ييزو چارواکو خبره ده چې د کندهار په نژدې ټولو ولسواليو کې عمليات پيل شوي او ځينې سيمې بمباردې شوې هم دي.

ظاهرآ داسې ښکاري چې د کومو زندانيانو د بيرته نيولو هيله نه وي د بمباريو په مټ د هغوى د وژلو هڅه شوې ده .

تر اوسه په بمباريو کې د وژل شويو کسانو شمېره نه ده ښکاره شوې .

په کندهار کې د ولايتي شورا رئيس احمدولي کرزي بي بي سي ته وويل چې د تېرې ورځي په اوږدو کې دوه موټر او يو کور د ناټو ځواکونو له لوري بمبارد شوي دي.

که څه هم ښاغلى کرزى وايي چې نژدې شل تنه زندانيان بېرته نيول شوي دي .

خو قاري يوسف احمدي چې د وسله والو طالبانو وياند ځان را پېژني ادعا کوي چې خپل ټول زندانيان يې تر خوندي سيمو رسولي دي .

هېڅ طالب زنداني د ده په خبره نه بيرته نيول شوى او نه هم وژل شوى دى.

وسله وال طالبان اوس دا هم وايي چې د وړمې شپې په لومړني ځانمرگي بريد کې چې د زندان لويه دروازه يې پرې والوزوله اتلس کيلو بارود ځاى پر ځاى شوي و .

د کندهار په زندان کې تر بريد وړاندې د زنداني شويو اسيرانو د شميرې په باب هم بيلا بيلې خبرې کيږي .

لومړى افغان چارواکو ١٣ سوه زندانيان يادول خو اوس وايي چې هلته يوازې يوزر او پنځوس زندانيان ساتل شوي و چې ٤٠٠ يې طالبان او پاتې نور يې په جنايي جرمونو تورن و. له بي بي سي سايټ څخه په مننې