کابل

د غويي ٢٧مه، پژواک خبري اژانس

ولسمشرحامد کرزى ،  د نړيوال اقتصاد د ټولنې په غونډه کې د ګډون په موخه، نن ماسپښين ، د کابل له نړيوال هوايي ډګر څخه  د مصر په لور روان شو .

ټاکل شوې ده ، چې د نړيوال اقتصاد د ټولنې دغه درې ورځنۍ غونډه چې په منځنۍ آسياکې رامنځ ته شوي بدلونونه به په کې هم څېړل کيږي، سبا د مصر په  شرم الشيخ ښار کې پيل شي . 

په هغه خبرپاڼه کې چې د کرزي د وياند له دفتره همدانن ( دغويي ٢٧مه )  خپره شوې، راغلي دي چې دغه غونډه به د مصر د جمهور رئيس حسن  مبارک او د امريکا د متحده ايالتونو د ولسمشر جورج بش په پرانيستونکيو ويناوو، پيل شي .

د سرچينې په حواله، کرزى به ددغې غونډې په دوهمه ورځ، ( د سولې د ټينګښت لپاره د نوې ستراتيژۍ ) په نوم جوړېدونکې ناستې ته وينا وکړي  .

د خبر پاڼې په اساس ،  کرزى به ددغې غونډې په ترڅ  کې، له جورج بش، د نړيوال بانک له رئيس رابرټ زوليک، د پاکستان له لومړي وزير يوسف رضا ګېلاني او د نړيوال اقتصاد د ټولنې له رئيس کلاووس شوهاب ، سره هم بېلابېلې کتنې ولري .

خبرپاڼه زياتوي چې له کرزي سره په دغه سفر کې د بهرنيو چارو وزير ډاکټر رنګين دادفر سپنتا ، د ملي امنيت په چارو کې د هغه سلاکار زلمى رسول او د هغه وياند همايون حميد زاده ملتيا کوي .

 ىشش  له پژوک څخه په مننې