له سختو امنيتي گامونو سره په لومړي ځل د ځغاستې په لسګونو لوبغاړو د سه شنبې په ورځ ( د غبرګولي ١٤، د جون ٣ ) د اروزګان په مرکز ترينکوټ کې ګډون وکړ .
د دغه ولايت د لوبو د برخې چارواکي وايي شاوخوا ١٠٠ تنو لوبغاړو په دغو لنډ واټنو ځغاستو کې برخه اخيستې وه .
دغه سيالۍ د ترينکوټ ښار له څاګۍ سيمې څخه د سهار په اوه نيمو بجو پيل او د درې کيلومتره واټن په وهلو د ولايت د مقام مخې ته په اته نيمو بجو پاى ته ورسېدې .
په دغو ځغاستو کې د ارزگان اوسېدونکو عبدالقدير لومړى، جواد دويم او صديق الله دريم مقام ترلاسه کړ .
د ځغاستې په پاى کې د اروزګان د والي اسدالله همدم او د لويو لارو د پوليسو د قوماندان مطيع الله پوپل له خوا پر ګټونکو لوبغاړو انعامونه ووېشل شول .
د دغې سيالۍ ګټونکي عبدالقدير وروسته له حکومت څخه وغوښتل چې په اروزګان کې د لوبو او لوبغاړو د ودې لپاره کار وکړي .
د ځغاستې نندارې ته د ترينکوټ گڼ شمېر اوسېدونکي راغلي وو، چې د لوبغاړو په وينا دا له لوبو سره د خلکو د مينې ښکارندويي کوي .
له بي بي سي سايټ څخه په مننې
| 
