ځوان خبريال عبدالصمد روحاني جنازه نن (دوشنبې، د غبرگولي ٢٠) له غرمې وړاندې د هلمند په مارجه ولسوالۍ کې خاورو ته وسپارل شوه .
د ځواني مرگ خبريال روحاني ورور حضرت محمد پژواک خبري اژانس ته ويلي چې د جنازې لمونځ نن شاوخوا ١١ بجې په مارجه ولسوالۍ کې ادا او ارواښاد روحاني په خپله پلرنۍ هديره کې خاورو ته وسپارل شو.
د خداى بښلي روحاني د جنازې په مراسمو کې د ١٠٠٠ خلکو له ونډې اخيستو سربېره د ځوانيمرگ خپلو خپلوانو، ليکوالانو، ژورنالېستانو او فرهنگيانو هم گډون کړى و .
د جنازې گډونوالو او د لښکرگاه د يوه قومي مشر عليشاه مظلوميار د روحاني وژل کېدل د ټول ولس وژل وبلل .
د طالبنو وياند قاري يوسف احمدي ويلي چې له روحاني سره دوى هېڅ ستونزه نه درلوده او ويلي دي چې هغه يو بې طرفه خبريال و .
احمدي زياته کړې چې طالبان نه يوازې د روحاني په وژنه کې لاس نه لري، بلکې غنده يې هم کوي .
| 
