افغان چارواکي وايي د افغانستان په لوېديځ فراه ولايت کې د سړک د  غاړې د ماين په چاودنه کې اته ولسي وگړي وژل شوي يو بل ټپي دى .

د فراه ولايت د والي مرستيال يونس رسولي ويلي چې د ولسي وگړو د سپرلۍ موټر گاونډي نيمروز ولايت ته روان و چې پر لاره پرې ښخ کړاى شوى ماين وچاودېد .

رسولي زياته کړه چې په دې چاودنه کې يو بل ولسي وگړى هم ټپي شوى دى .

د يادونې وړ ده چې د افغانستان گاونډي ايران هېواد پولې ته څېرمه سيمې په دې وروستيو کې د وسله والو بريدونو شاهدې وې .

سربېره پردې چې وسله وال کسان هڅه کوي چې پوځيان او د هغوى گاډي په نخښه کړي، خو ډېرى وخت يې قربانيان ولسي وگړي شي .

د شمېرنو له مخې د روان ٢٠٠٨ کال له پيل راهيسې د هېواد په بېلابېلو پېښو کې شاوخوا ١٢٠٠ افغانان وژل شوي دي .

فراه د لوېديځې حوزې ولايت دى چې يو شمېر ولسوالۍ يې لکه دلارام او بالابلوک د ناامنه سيمو له جملې څخه شمېرل کېږي .

په دې سيمه کې د روان کال په ترڅ کې ددولتي ځواکونو او طالبانو ترمنځ نښتو کې دواړو خواوو ته مرګ ژوبله او زيانونه اوښتي دي .

دوه ورځې وړاندې هم له دې ولايت څخه د ١٥ وسله والو طالبانو، دوو ملي پوليسو او د ايتلافي ځواکونو د يوه سرتېري د وژل کېدا خبر ورکړل شوى و .

د ايتلاف يوه ټپي سرتېري ساه ورکړه

ايتلافي ځواکونه وايي د افغانستان په سوېل ختيځ کې يې يو ټپي شوى سرتېرى مړ شوى دى .

دوى زياتوي چې دغه سرتېرى تېره ورځ (دوشنبه، د غبرگولي شپږمه) په پکتيکا ولايت کې د يوې پېښې په ترڅ کې ټپي شو وروسته يې په روغتون کې ساه ورکړه .

ايتلافي ځواکونو د پېښې او د مړه شوي سرتېري د تابعيت په اړه څه نه دي ويلي .

خو د ويلو وړ ده چې په دې ولايت کې امريکايي سرتېري مېشت دي .

وړمه ورځ هم په لوېديځ ولايت فراه کې يو امريکايى سرتېرى وژل شوى و .

 له بي بي سي نه په مننې